విశ్వంలో...........వింత గ్రహం

-అంతరిక్ష కక్ష్యలో అసహజరీతిలో ప్రయాణం

లాస్ ఏంజెలెస్, మార్చి 19: సౌరవ్యవస్థ వెలుపల అసాధారణ లక్షణాలున్న వింత గ్రహాన్ని అమెరికాలోని శాన్‌ఫ్రాన్సిస్కో స్టేట్ యూనివర్సిటీ శాస్త్రవేత్తలు కనుగొన్నారు. గతంలో ఇప్పటివరకు ఎన్నడూ చూడని విధంగా ఉన్న ఈ గ్రహం అసహజరీతిలో కక్ష్యలో తిరుగున్నదనే విషయాన్ని గుర్తించారు. అంతేకాకుండా ఈ గ్రహం నుంచి వెలువడే కాంతి ఆకస్మాత్తుగా హెచ్చుతగ్గులకు లోనవుతున్నట్టు గ్రహించారు. ఈ గ్రహ ప్రవర్తన తీరు తోకచుక్కను పోలివుందని పేర్కొన్నారు. భూమికి 117 కాంతి సంవత్సరాల దూరంలో ఉన్న ఈ వింత గ్రహాన్ని హెచ్‌డీ 20782గా వ్యవహరిస్తున్నారు. 

సాధారణంగా సౌర వ్యవస్థలో గ్రహాలు దీర్ఘవృత్తాకార కక్ష్యలో తిరుగుతుంటాయని, ఇందుకు భిన్నంగా సౌరవ్యవస్థ వెలుపల ఉన్న కొన్ని గ్రహాల కక్ష్య అసాధారణంగా ఉన్నదని శాస్త్రవేత్తలు గుర్తించారు. కక్ష్యకు దూరంగా వెళ్లడమే కాకుండా, చాలా దూకుడు స్వభావంతో వేగంగా ప్రయాణిస్తునే విషయాన్ని తెలుసుకున్నారు. దీని కక్ష్య తీరు దీర్ఘవృత్తాకారంలో కాకుండా ఒడిసెలతో విసిరిన రాయిలా ప్రయాణిస్తున్నదని వెల్లడించారు. ఈ గ్రహాన్ని పరిశీలించిన తర్వాత.. ఇలాంటి లక్షణాలు గ్రహాలు సౌరవ్యవస్థలో లేవని నిర్ధారణకు వచ్చామని శాన్‌ఫ్రాన్సిస్కో వర్సిటీ ప్రతినిధులు వెల్లడించారు. ఈ గ్రహానికి సంబంధించిన డాటాను నూతన పరిమితులతో శాటిలైట్ ఆధారిత టెలిస్కోప్ ద్వారా సేకరించారు.