TS CETs: తెలంగాణ 'సెట్స్‌' షెడ్యూల్‌లో మార్పులు

• లాసెట్, పీఈసెట్, పీజీఈసెట్, ఎడ్‌సెట్ తేదీల్లో మార్పు
• కొత్త షెడ్యూల్‌ను విడుదల చేసిన ఉన్నత విద్యామండలి
• సెట్స్‌ వెబ్‌సైట్లలో మాక్‌ టెస్టుల లింకులు

తెలంగాణలో వివిధ వృత్తివిద్యా కోర్సుల్లో ప్రవేశాల కోసం నిర్వహించనున్నఉమ్మడి ప్రవేశ పరీక్షల షెడ్యూల్‌లో మార్పులు జరిగాయి. ఉన్నత విద్యామండలి చైర్మన్‌ పాపిరెడ్డి అధ్యక్షతన జరిగిన సెట్స్‌ కన్వీనర్ల సమావేశంలో నిర్ణయం తీసుకున్నారు. రాష్ట్రంలో మే నెలలో నిర్వహించే నాలుగు ప్రవేశ పరీక్షల తేదీల్లో మార్పులు చేశారు. ఈ నెల ఐదో తేదీన ప్రకటించిన షెడ్యూల్ ప్రకారం పరీక్షలు నిర్వహిస్తే జేఈఈ మెయిన్ వంటి జాతీయ పరీక్షలకు హాజరయ్యే విద్యార్థులు ఇబ్బందిపడే అవకాశం ఉండటంతో ఈ నిర్ణయం తీసుకున్నారు. 

లాసెట్, పీఈసెట్, పీజీఈసెట్, ఎడ్‌సెట్ తేదీల్లో స్వల్ప మార్పులు చేశారు. మిగతా పరీక్షల షెడ్యూల్‌లో ఎలాంటి మార్పులు లేవు. లాసెట్ మే 26కు జరగాల్సి ఉండగా.. మే 20న జరుగుతుంది. మే 20 నుంచి ప్రారంభం కావాల్సిన పీఈసెట్, పీఈటీ పరీక్షలను మే 15నుంచి నిర్వహిస్తారు. మే 27 నుంచి 29 వరకు నిర్వహించాల్సిన పీజీఈసెట్ ప్రవేశ పరీక్షలు.. 28 నుంచి 31 వరకు జరుగుతాయి. ఎడ్‌సెట్ మే 30,31న జరగాల్సి ఉండగా.. మే 31కి మాత్రమే కుదించారు. 

సెట్	పాత షెడ్యూల్	సవరించిన షెడ్యూల్
లాసెట్, పీజీ లాసెట్‌	మే 26	మే 20
పీఈసెట్‌	మే 20	మే 15
పీజీఈసెట్‌	మే 27, 28, 29	మే 28, 29, 30, 31
ఎడ్‌సెట్‌	మే 30, 31	మే 31

అలాగే ప్రవేశపరీక్షలు ఆన్‌లైన్‌లో నిర్వహిస్తున్నారు కాబట్టి.. పరీక్షా కేంద్రాల్లో సాంకేతిక సమస్యలు తలెత్తకుండా టెక్నీషియన్లను అందుబాటులో ఉంచాలని నిర్ణయించారు. ఆన్‌లైన్‌ పరీక్షలకు విద్యార్థులు సిద్ధమయ్యేలా సెట్స్‌ వెబ్‌సైట్లలో మాక్‌ టెస్టుల లింకులను అందుబాటులో ఉంచబోతున్నారు.