14 నుంచి పోలీసు అభ్యర్థుల ధ్రువపత్రాల పరిశీలన

 

* రాష్ట్రవ్యాప్తంగా 18 కేంద్రాల ఏర్పాటు

* 11 నుంచి 13వ తేదీ వరకు వెబ్‌సైట్‌లో ఇంటిమేషన్‌ లెటర్ల

హైదరాబాద్‌: ఎస్సై, కానిస్టేబుల్‌ స్థాయి అభ్యర్థుల ఎంపిక ప్రక్రియలో భాగంగా తుది రాతపరీక్షలో అర్హత సాధించిన వారి ధ్రువపత్రాలను జూన్‌ 14 నుంచి 26 వరకు పరిశీలించనున్నారు. ఈ మేరకు తెలంగాణ రాష్ట్రస్థాయి పోలీస్‌ నియామక మండలి 18 కేంద్రాల్ని ఎంపిక చేసింది. రోజుకు సగటున దాదాపు 9 వేల మంది చొప్పున మొత్తం 1,09,906 మంది పత్రాల్ని పరిశీలించనున్నారు. జూన్‌ 11న ఉదయం 8 గంటల నుంచి 13న రాత్రి 8 గంటల వరకు అభ్యర్థుల ఇంటిమేషన్‌ లెటర్లను మండలి వెబ్‌సైట్‌లో ఉంచనున్నట్లు మండలి ఛైర్మన్‌ వి.వి.శ్రీనివాసరావు వెల్లడించారు.

ప్రక్రియ సాగుతుంది ఇలా..

* అభ్యర్థులకు కేటాయించిన తేదీన ఉదయం 9 గంటలకు ఆయా కేంద్రంలో రిపోర్ట్‌ చేయాల్సి ఉంటుంది. మండలి వెబ్‌సైట్‌ నుంచి డౌన్‌లోడ్‌ చేసుకున్న ఇంటిమేషన్‌ లెటర్‌ను తప్పనిసరిగా చూపించాలి. 

* దరఖాస్తు వివరాల్లో సవరణలు అవసరం లేని అభ్యర్థులు నేరుగా పత్రాల పరిశీలన చేయించుకోవచ్చు. ఒకవేళ సవరణల కోసం ఇప్పటికే ఆన్‌లైన్‌లో అర్జీ పెట్టుకొని ఉంటే ఆ ప్రతిని తప్పనిసరిగా వెంట తెచ్చుకోవాలి. అభ్యర్థి సమక్షంలోనే ఆ సవరణల్ని మండలివర్గాలు ఆమోదిస్తాయి.

* డ్రైవింగ్‌ లైసెన్స్‌ కలిగి ఉన్న వారికి కొన్ని పోస్టుల్లో అదనపు మార్కులు కలపనున్నట్లు నోటిఫికేషన్‌లోనే ప్రకటించారు. ఈ మేరకు అభ్యర్థులు సంబంధిత వివరాలను అందజేయాలి

* ఒరిజినల్‌ ధ్రువీకరణ పత్రాలతోపాటు ఫొటోకాపీలను తీసుకురావాలి. వాటిని పరిశీలించిన అనంతరం వచ్చే అర్హత పత్రంలో సంతకం చేయడంతో ప్రక్రియ పూర్తవుతుంది.

పరిశీలన కేంద్రాలు ఎక్కడెక్కడంటే..

యూనిట్‌	కేంద్రం	అభ్యర్థులు
ఆదిలాబాద్‌	ఏఆర్‌ హెడ్‌క్వార్టర్స్‌	4918
సైబరాబాద్‌	సైబరాబాద్‌ కమిషనరేట్‌ గ్రౌండ్‌	8509
హైదరాబాద్‌	గోషామహల్‌ స్టేడియం	7459
కరీంనగర్‌	పోలీస్‌ హెడ్‌క్వార్టర్స్‌	5814
ఖమ్మం	సీఏఆర్‌ హెడ్‌క్వార్టర్స్‌	6425
కొత్తగూడెం	సీఈఆర్‌క్లబ్‌	4000
మహబూబాబాద్‌	డిస్ట్రిక్స్‌ పోలీస్‌ ఆఫీస్‌	7034
మహబూబ్‌నగర్‌	డీఏఆర్‌ హెడ్‌క్వార్టర్స్‌	4896
నాగర్‌కర్నూల్‌	డిస్ట్రిక్స్‌ పోలీస్‌ ఆఫీస్‌	3865
గద్వాల్‌	డిస్ట్రిక్స్‌ పోలీస్‌ ఆఫీస్‌	4967
నల్గొండ	పోలీస్‌ హెడ్‌క్వార్టర్స్‌	7480
నిజామాబాద్‌	పోలీస్‌ పరేడ్‌ గ్రౌండ్‌	5313
రాచకొండ	సీఏఆర్‌ హెడ్‌క్వార్టర్స్, అంబర్‌పేట	7737
రామగుండం	పోలీస్‌ కమిషనర్‌ కార్యాలయం	6341
సంగారెడ్డి	ఏఆర్‌ హెడ్‌క్వార్టర్స్‌	7065
సిద్దిపేట	పోలీస్‌ కమిషనరేట్‌	4409
సూర్యాపేట	డిస్ట్రిక్స్‌ పోలీస్‌ ఆఫీస్‌	5968
వరంగల్‌	పోలీస్‌ కమిషనర్‌ కార్యాలయం	7706